Месец дена апсолутен мрак во Скопје. Откажани еден куп концерти (меѓу кои и bor.FEST 1.0 на кој толку многу му се радувавме), неколку од нив префрлени на локации кои што воопшто не одговараат на природата на самата свирка (ама што да се прави?). Единствениот вистински концертен клуб во градов затворен.
Туку, доста размислуваме на таа тема. Тоа нека остане само лошо минато. Време е да се спремате за повторното отварање на клубот Кастро. Казната наречена 30 дена неработење завршува на 04.04., а веќе наредниот ден (05.04.) би сакале да Ве поканиме на концертот на Ana Never (Суботица) и Mooger Fooger (Скопје). Почетокот на концертот е закажан за 21 часот, а цената на влезницата е 150 денари.

Рокенролот го враќа ударот!

.

Ana Never (http://www.myspace.com/ananever) се формирани во Суботица пролетта 2002 година. Инспирирани од музиката која ја слушале и мотивирани од личните емоции и стравови, започнуваат да создаваат музика која претставува скромен обид за повеќедимензионално изразување на чувствата, мислите и визиите. Имаат работено на музиката за театарската претстава A Diary of a Morphinist. Во април 2006 година го издаваат својот прв албум, Ana Never. Денеска тие функционираат во следната постава: Срѓан Терзин (гитара), Дејан Топиќ (гитара), Горан Грубишиќ (тапани), Иван Чкоњевиќ (гитара, бас) и Бане Филиповиќ (визуелизација). Знаејќи дека не постои линија помеѓу постоењето и непостоењето на Ana Never како бенд, тие живеат во очекување дека на крајот тоа нема да се преобрази во тажно преживување и дека ќе продолжат да функционираат како мисла за нешто мало и убаво. Искра надеж, трошка сознание дека секоја песна може да биде последна, несигурни во проклетата тишина, исчекување..

Mooger Fooger (http://www.myspace.com/moogerfoogersk) е првата асоцијација кога се дискутира на темата македонски рокенрол. Без двоумење станува збор за најактивниот музички состав во земјава. Бенд кој и покрај хиперпродуктивноста звучи исклучително занимливо и квалитетно на сите свои албуми. Една од ретките музички групи од Македонија која ги следи светските музички текови. Широк е опсегот на влијанија врз нивната музика, започнувајќи од американската психоделија од 60те па се до британските indie rock бендови од 80те. Mooger Fooger се: Сеад Хаџиќ (гитара), Огнен Мангаровски (гитара), Антонио Дојчиновски (бас), Виктор Гајтановски (вокал и гитара) и Андреј Анастасов (тапани). Важат за еден од најкомплетните состави во регионот. Во своето неколкугодишно постоење издадоа три албуми: Mooger Fooger (2005), Mooger Fooger 2 (2006) и Luckiest Woman (2007). После подолго време, повторно со нов материјал и концерт во Скопје.

Концертот на Ласт.фм