Еве зошто мораме малку повеќе да поработиме во креветот

Македонскиот народ исчезнува од Македонија!
Сите демографски индикатори ни се под критичните граници и ако нешто не се преземе опстанокот на македонскиот народ ќе биде доведен во прашање
За десетина години ќе почне процесот на апсолутно намалување на популацијата во Македонија, предупредува демографот Славе Ристески, професор на Економскиот факултет во Скопје. Речиси половина општини имаат негативен природен прираст, а се намалува и вкупниот прираст на населението, покажуваат статистичките податоци.

Само еден поглед врз статистиката е доволен за да се уочи лошата „крвна слика“ на нашата нација. Паѓаат наталитетот и бројот на склучени бракови, се зголемува просечната старост на жените што првпат раѓаат, се зголемува просечната старост на населението, како и процентот на стари лица во вкупната популација.

ОПАСНА ЗОНА

- Состојбата не ни е добра. Македонија се наоѓа во опасна зона. Сите индикатори ги надминуваат критичните граници. До 2020-50 ќе почне процес со кој ќе имаме апсолутно намалување на популацијата - смета Ристески, автор на повеќе истражувачки дела од областа на демографијата.

Според последните податоци на Државниот завод за статистика, бројот на населението во Македонија во периодот од април до јуни се зголемил за само 774 лица, а во таа бројка македонската заедница учествува најмалку. Во 36 од вкупно 84 општини, бројот на починати лица е поголем од бројот на новороденчиња, односно прирастот бил негативен, а во 4 општини тој број бил ист. Тоа не се случува само во напуштените села, туку и во метрополата. Во Скопје, бројот на жителите се намалил во општините Карпош, Кисела Вода и во Центар.

Лани бројот на жителите во земјава се зголемил за само 3.094, а 36 општини со доминантно македонско население имале негативен прираст. Три од осумте статистички региони имаа намален број население - вардарскиот, источниот и пелагонискиот. Просечната стапка на прираст беше 1,5. Најкритично е во општините Дебарца - со намалување од 16,6 промили, Старо Нагоричане (-15,1), Вранешница (-12,9), Новаци (-11,4) и Другово (-10 промили). Највисок прираст имале Студеничани (16,5), Арачиново (16) и Желино (9,9).

Ристески предупредува дека клучните демографски индикатори во Македонија се над критичните граници. Македонците се на прагот на процесот на исчезнување.

- Во 1948 година наталитетот бил 48 промили, а сега е околу 11. Стапката од 14 се смета за критична граница. Во 1953 година просекот на фертилитетот (стапка на прираст) бил 6 деца за време на плоден период од 15 до 49 години, фертили контингенти), тоталната стапка на фертилитет е највисока од 20 до 29 година. Денес просекот е 1,5 дете. Истовремено, имаме зголемување на старото население, кое е околу 15 отсто, а критично ниво се смета дека е 12 отсто од популацијата - вели Ристески.

СТАРА НАЦИЈА

Тој појаснува дека Македонија се наоѓа во посттранзициски период, во кој почнува стареење на населението и намалување на наталитетот. Демографски, Македонија не се разликува од европските земји, иако скандинавските земји имаат поголем наталитет. Стануваме стара нација. Од 80-тите години го минавме процесот на демографска транзиција. На развиените земји им требаа 80-100 години, ние го минавме за 30 години. Во 1953 година просечната старост на населението била околу 25 години, сега е 35,4 години. Критична граница е 30 години, по што почнува стареење. Ова се потврдува со подоцното склучување бракови и раѓање прво дете. Со тоа се намалува и периодот на репродукција и природниот прираст - вели демографот.

Тој објаснува дека еден од клучните фактори за сегашната состојба се и неконтролираните миграции. Според истражувањата, од 1948 година до денес околу 700.000 луѓе мигрирале од село во град. Половина од новороденчињата лани биле родени во градовите, а една третина во Скопје. Бројот на иселеници што ја напуштиле Македонија демографите го проценуваат на 350.000-500.000 лица.

- По правило, тоа се трајни емиграции. Се иселуваат млади луѓе кои таму засноваат семејство, со што понатаму се намалува наталитетот во земјава - објаснува Ристески.Друг фактор, според професорот, се културата и религијата.

- За споредба, Саудиска Арабија е развиена и богата земја, со бруто-домашен производ десетпати поголем од Македонија. Во такви услови би требало да се очекува низок природен прираст. Но земјата има 30 промили наталитет - вели Ристески.
ИНФО-Алармантни бројки

Во 1948 година наталитетот бил 48 промили, а сега е околу 11. Стапката од 14 се смета за критична граница. Во 1953 година просекот на фертилитетот (стапка на прираст) бил 6 деца за време на плоден период од 15 до 49 години, фертили контингенти), тоталната стапка на фертилитет е највисока од 20 до 29 година. Денес просекот е 1,5 дете. Истовремено, имаме зголемување на старото население, кое е околу 15 отсто, а критично ниво се смета дека е 12 отсто од популацијата.